Ekkert skráningargjald
Í tilefni af 10 ára afmæli Fiskidagsins mikla á Dalvík verður föstudaginn 6. ágúst boðið upp á almenningshlaup sem skokkhópurinn Eyrarskokk á Akureyri stendur fyrir í samstarfi við Fiskidaginn. Ekkert skráningargjald verður í hlaupið.

Þrjár vegalengdir

• Í fyrsta lagi verður boðið upp á að skokka Svarfaðardalshringinn sem mælist tæpir 26 km (hlaupið frá Víkurröst á Dalvík fram austanverðan Svarfaðardal, yfir Tungurnar og niður dalinn vestanverðan, hlaupið upp að Böggvisstöðum og endað við Sundlaug Dalvíkur).
• Í öðru lagi 10 km hlaup þar sem hlaupið verður eftir þjóðveginum frá bænum Steindyrum í vestanverðum Svarfaðardal og endað við Sundlaug Dalvíkur
• Í þriðja lagi 3 km skemmtiskokk þar sem hlaupið er frá bænum Syðra-Holti í vestanverðum Svarfaðardal eins og leið liggur til Dalvíkur og eins og í hinum vegalengdunum hlaupið upp afleggjarann að Böggvisstöðum og endað við Sundlaug Dalvíkur.

Starttímar
Startað verður í Svarfaðardalshringinn klukkan 14.30 föstudaginn 6. ágúst frá Víkurröst. Klukkustund síðar, kl. 15.30, verður startað í 10 km hlaupið og kl. 16 í skemmtiskokkið. Ath. að þátttakendur í 10 km og 3 km skemmtiskokki þurfa sjálfir að koma sér á upphafsstaði hlaupanna frammi í Svarfaðardal, en þeir verða glögglega merktir.
Tímataka verður í bæði 10 km og Svarfaðardalshringnum og verða drykkjarstöðvar fyrir hlaupara í þessum vegalengdum. Ölgerðin styrkir hlaupið með því að leggja til drykki fyrir hlauparana.
Þrír efstu í karla- og kvennaflokki  í bæði Svarfaðardalshringnum og 10 km hlaupinu hljóta verðlaun.

Skráning
Þeir sem vilja hlaupa annað hvort Svarfaðardalshringinn eða 10 km eru beðnir að skrá sig með því að senda tölvupóst eða hringja í Óskar Þór Halldórsson (oskarth@ruv.is - 898 4294) eða Einar Eyland (eey@eimskip.is - 842 7821). Skráningar verða að hafa borist í allra síðasta lagi um hádegi fimmtudaginn 5. ágúst. Þátttakendur í skemmtiskokkið þurfa ekki að skrá sig. Þeir mæta einfaldlega á upphafsstað hlaupsins á móts við Syðra-Holt þar sem þeim verður startað kl. 16.
Númer hlaupara í Svarfaðardalshringnum og 10 km hlaupinu verða afhent við Víkurröst frá kl. 12 til 14 föstudaginn 6. ágúst.

Einstök stemning á Dalvík!
Við hlökkum til þess að sjá ykkur í þessu nýja hlaupi hér á landi. Alveg upplögð æfing fyrir Reykjavíkurmaraþonið síðar í ágúst að ekki sé talað um að upplifa einstaka stemningu á Dalvík á Fiskisúpukvöldinu að kvöldi föstudagsins 6. ágúst (eftir hlaupið) og daginn eftir á sjálfan Fiskidaginn mikla.