Fjalla- og skemmtihlaupið Þrístrendingur verður haldið í þriðja sinn laugardaginn 23. júní 2012. Þarna verður ekki keppt við tímann heldur miklu frekar keppst við að njóta dagsins og félagsskaparins. Hlaupið er öllum opið og þátttakendur velja sjálfir hvort þeir hlaupa alla leið eða bara einn eða tvo áfanga af þremur.

Hlaupið hefst á hlaðinu á Kleifum í Gilsfirði. Þeir sem telja sig frekar hægfara leggja af stað kl. 10:30, en þeir sem telja sig fljótari í förum leggja af stað kl. 11:00. Frá Kleifum er hlaupið norður Steinadalsheiði að Stóra-Fjarðarhorni í Kollafirði. Þar sameinast hópurinn og heldur áfram ferðinni yfir Bitruháls að Gröf í Bitrufirði, og loks suður Krossárdal að Kleifum.

Hlaupið allt er rúmir 40 km og má reikna með að ferðin taki 6-7 klst. með hléum.

Allar nánari upplýsingar um hlaupið er að finna á bloggsíðu Stefáns Gíslasonar og á Fésbókarsíðu hlaupsins.